एजेन्सी, मोहम्मद सालाहले लिभरपुलका लागि लगातार नवौं खेलमा गोल गर्दै अर्को इतिहास लेखेको दिन लिभरपुलले च्याम्पियन्स लिग समूह ‘बी’को नाटकीय खेलमा १० खेलाडीमा सीमित भएर मैदान छोडेको एट्लेटिको मड्रिडमाथि ३-२ को जित हासिल गरेको छ ।
घरेलु मैदानमा एट्लेटिकोका लागि दुई गोल गरेका एन्टोनी ग्रिजम्यानले ५२औं मिनेटमा सोझै रातो कार्ड सामना गरेपछि एट्लेटिकोले बाँकी समय १० खेलाडीमा सीमित भएर संघर्ष गर्नुपरेको थियो ।
यसअघि आठौं मिनेटमा मोहम्मद सालाहले उच्च फर्मको निरन्तरता दिँदै लिभरपुललाई अग्रता दिलाएका थिए । त्यसको पाँच मिनेटपछि नाबी केइटाले अर्को गोल गरेपििछ वान्डा मेट्रोपोलिटानोमा लिभरपुलले खेल पूर्ण रुपमा आफ्नो नियन्त्रणमा लिएको थियो ।
तर ग्रिजम्यानले दुई गोल गरेपछि मध्यान्तरअघि नै एट्लेटिको खेलमा फर्कियो । कोकेको पासमा २०औं मिनेटमा पहिलो गोल गरेका ग्रिजम्यानले जोआवो फेलिक्सको पासलाई गोलमा परिणत गर्दै ३४औं मिनेटमा एट्लेटिकोलाई बराबरीमा ल्याएका थिए ।
दोस्रो हाफको सुरुमै ग्रिजम्यानको रातो कार्डसँगै एट्लेटिकोको टोलीमा एक खेलाडी कम भएपछि लिभरपुलले त्यसको फाइदा उठायो । तथापि गोलका लागि संघर्ष गरिरहेको भ्रमणकारी टोलीका लागि समय सकिन १२ मिनेट बाँकी रहँदा सालाहले पेनाल्टीमार्फत विजयी गोल गरे । जारी सिजनको च्याम्पियन्स लिगमा लिभरपुलको यो तीन खेलमा तेस्रो जित हो ।
एट्लेटिकोका मारियो हेर्मोसोले डियोगो जोटालाई धकेलेवापत प्राप्त पेनाल्टीमा सालाहले खेलको दोस्रो व्यक्तिगत गोल गरेका थिए ।
सोही समूहको अर्को खेलमा मंगलबार राति एफसी पोर्टोले एसी मिलानमाथि १-० को जित हासिल गर्यो ।
पोर्टोलाई घरेलु मैदानमा जित दिलाउन लुइस डियाजको एउटै गोल पर्याप्त भयो । डियाजले ६५औं मिनेटमा मेहदी टारेमीको पासलाई गोलको दिशा दिलाएका थिए ।
मंगलबार रातिका नतिजापछि तीन खेलमा नौं अंक जोडेको लिभरपुल समूहको शीर्ष स्थानमा रहँदा समान चार अंक जोडेका एट्लेटिको र पोर्टो दोस्रो र तेस्रो स्थानमा छन् । मिलानले अंकको खाता खोल्न सकेको छैन ।
