ला लिगामा बार्सिलोनाको खराव प्रदर्सन जारी

बार्सिलोनाले एइवरसँग १–१ गोलको बराबरी खेल्दै अंक बाड्न बाध्य बनेको हो ।

मुख्य खेलाडी तथा कप्तान लियोनेल मेस्सी चोटका कारण टोलीमा अनुपस्थित रहँदा टोलीले ७३ प्रतिशत बल पोसेसन राखेपनि गोलको लागि निकै संघर्ष गर्नुपरेको थियो । बार्सिलोनाको केही प्रहारमा गोलरक्षक डिमिट्रोभिक बाधक बनेको थियो ।

नोउक्याम्पमा मंगलबार राति भएको खेलमा घरेलु टोली बार्सिलोनाले खेलको सुरुवातदेखि नै एइवरलाई दवावमा राखेको थियो । खेलको आठौं मिनेटमा नै मार्टिन ब्रेथवेट पेनाल्टीमा चुक्दा बार्सिलोनाले अग्रता लिन सकेन ।

पेनाल्टी बक्समा बिगासले एराउजोलाई फल गरेपछि रेफ्रीले भिएआरको सहायता लिदै बार्सिलोनालाई पेनाल्टी प्रदान गरेको थियो । तर, मेस्सीको अनुपस्थितिमा ब्रेथवेटको बाहिरिएको थियो ।

२२औं मिनेटमा मिरालेम प्यानिचको कर्नरमा एराउजोको हेडरलाई गोलरक्षक डिमिट्रोभिकले एक खुट्टाले बचाउदा बार्सिलोना पुनः खेलमा अग्रता लिनबाट चुक्यो । २५औं मिनेटमा ब्रेथवेटले गोल गरेपनि भिएआरबाट अफसाइड ठहरिदा उनको गोलले मान्यता पाएन ।

३५औं मिनेटमा काड्जिअरको प्रहारलाई बार्सिलोनाका गोलरक्षक मार्क आन्दर टेर स्टेगनले सहजै बचाए । ५०औं मिनेटमा औसमाने डेम्वेलेको प्रहार पोस्ट नजिकैबाट बाहिरियो । लगत्तै ५२औं मिनेटमा एन्टोइन ग्रिजमनको प्रहारले पनि पोस्टको दिशा लिन सकेन ।

लगातार दवाव झेलेको एइवरले ५७औं मिनेटमा किकेको गोलबाट बार्सिलोनाविरुद्ध अग्रता लिन सफल भयो । ६७औं मिनेटमा डेम्वेलेले गोल गर्दै खेललाई १–१ गोलको बराबरीमा ल्याए । दोस्रो हाफका शुरुमै सर्जिनो डेस्टको स्थानमा मैदान छिरेका डेम्वेलेले जुनियर फिर्पाेको पासमा गोल गरेका थिए ।

८६औं मिनेटमा पेड्रीको प्रहार बारमा लागेर फर्कदा बार्सिलोनाले अग्रता लिन सकेन । इन्ज्युरी समयमा ट्रिन्काओले अवसर पाएपनि सदुपयोग गर्द नसक्दा बार्सिलोना बराबरीमा रोकियो ।

यो बराबरीसँगै बार्सिलोना १५ खेलबाट २५ अंक जोडेर छैटौ स्थानमा रहेको छ । बार्सिलोनालाई रोकेको एइवर १६ अंक जोडेर १५औं स्थानमा रहेको छ ।