जापानमा एक युवकले लामखुट्टे मारेर सामाजिक सन्जाल ट्वीटरमा फोटो अपलोड गरेपछि ट्वीटरले नियम उल्लंघन गरेको अभियोगमा उनको ‘एकाउन्ट’ नै बन्द गरिदिएको छ।
‘नेमु इज माइ वाइफ’ ट्वीटर ‘ह्यान्डल’ रहेको ती युवकले लामखुट्टे मारेर ट्वीटरमा पोस्ट गरेपछि उनको पोष्टलाई ३१ हजारभन्दा बढी ट्वीटर प्रयोगकर्ताहरुले रिट्वीट् र २७ हजारभन्दा बढीले लाइक गरेका थिए। त्यसपछि ट्वीटरले उनको एकाउन्ट नै बन्द गरिदिएको ‘बीबीसी’ले उल्लेख गरेको छ।
ती युवकले टीभी हेर्नेक्रममा आफूलाई टोकेको लामखुट्टेलाई मारेपछि फोटो खिचेर ट्वीटरमा पोस्ट गर्दै लेखेका थिए।
आफ्नो एकाउन्ट बन्द भएपछि ती युवकले नयाँ एकाउन्ट मार्फत ट्वीटरको निर्णयको आलोचना गर्दै अचम्ममा परेको बताएका छन् । उनले भनेका छन्, ‘मैलै लामखुट्टे मारेर फोटो पोस्ट गरेपछि मेरो पहिलेको एकाउन्ट सँधैको लागि बन्द भएको छ, के यो सामाजिक सन्जालको उल्लघंन हो र?’
‘फर्च्यून म्यागजिन’ का अनुसार ट्वीटरले पछिल्लो समय आफ्नो सन्जालमा दुरुपयोग, दुव्र्यबहार तथा उत्पीडन तथा अन्य शर्तको उल्लघंन गर्ने शब्द तथा फोटो पहिल्याउन ‘एल्गोरिथ्म’ कार्यक्रम लागु गरेको छ।
