स्पेनिस क्लब रियल म्याड्रिडले च्याम्पियन्स लिग अन्तर्गत समुह चरणको अन्तिम खेलमा फराकिलो जित हासिल गरेको छ ।
रियलको घरेलु मैदानमा सेल्टिकमाथि ५–१ को जित दर्ता गरेको हो ।
बुधबार राति भएको खेलमा लुका मोड्रिच, रोड्रिगो, मार्काे एसेन्सियो, भिनिसियस जुनियर र फेडे भाल्भेर्डेले गोल गरे । सेल्टिकका जोटाले एक गोल फर्काए ।
खेलको छैटौं मिनेटमा नै लुका मोड्रिचले पेनाल्टीमा गोल गर्दै रियललाई १–० ले अघि बढाए ।
२१ औं मिनेटमा रोड्रिगोले पेनाल्टीमा गोल गर्दै रियलको अग्रता दोब्बर पारे ।
५१ औं मिनेटमा मार्काे एसेन्सियाले गोल गर्दै रियललाई ३–० ले अघि बढाए । ६१ औं मिनेटमा भाल्भेर्डेको पासमा भिनिसियसले गोल गर्दै रियललाई फराकिलो जिततर्फ अघि बढाए । ७१ औं मिनेटमा फेडे भाल्भेर्डेले गोल गर्दै रियललाई ५–० ले अघि बढाए ।
८४ औं मिनेटमा जोटाले फ्रिकिकमा सिधै गोल गर्दै खेललाई ५–१ को स्थितिमा ल्याएपनि त्यसपछि थप गोल निस्कन नसक्दा रियलले सान्दार जित निकाल्न सफल भयो ।
जितसँगै रियल ६ खेलबाट १३ अंक जोडेर समूह ‘एफ’ मा शीर्षस्थानमा रह्यो । सेल्टिक २ अंक जोडेर पुछारमा रह्यो ।
