रहेनन् क्यामरुन फुटबलका पूर्वकप्तान

क्यामरुनी फुटबल टोलीका पूर्वकप्तान स्टेफन टाटवको ५७ वर्षको उमेरमा निधन भएको छ । क्यामरुनलाई सन् १९९० को विश्वकपको क्वाटरफाइनलमा पुर्‍याएपछि चर्चित बनेका उनको निधनको कारण भने सार्वजनिक गरिएको छैन ।

अफ्रिकाको पहिलो टोली क्वाटरफाइनल पुग्ने क्रममा क्यामरुनले उद्घाटन खेलमै डिफेन्डिङ च्याम्पियन अर्जेन्टिनालाई १–० ले पराजित गरी स्तब्ध पारेको थियो । त्यसपछि क्यामरुनले रोमानिया र कोलम्बियामाथि जित हात पारेको थियो ।

त्यसको चार वर्षपछि अमेरिकामा अर्को विश्वकप खेल्न आउँदा क्यामरुनको त्यो सान रहेन । समूह चरणबाटै बाहिरिएको क्यामरुनलाई रुसले ६–१ ले पराजित गरेको थियो । रुसको ओलेग सालेन्कोले विश्वकपमा एकै खेलमा ५ गोल गर्ने कीर्तिमान बनाएका थिए ।
टाटवले क्लब फुटबल क्यामरुनको टोली टोनेरे याउन्डे र ओलम्पिक एमभोल्येबाट खेलेका थिए । जापानमा टोसु फ्युर्च्सबाट खेल्दै उनले आफ्नो खेलजीवन टुंगाएका थिए ।