बुधबार राती भएको खेलमा जितसंगै युभेन्टस कोपा इटालियाको क्वाटरफाइनलमा प्रवेश गरेको छ ।
घरेलु मैदानमा बुधबार राति भएको खेलमा युभेन्टसले जिनोआलाई ३–२ ले पराजित गर्दै अन्तिम आठको यात्रा तय गरेको हो । युभेन्टसको जितमा डिजान कुलुसेभ्स्की, अल्भारो मोराटा र हम्जा राफियाले गोल गरे । जिनोआका लेननार्ट सिबोरा र फिलिप्पो मेलेगोनीको गोल सान्त्वना बन्यो ।
एलिएन्ज एरिना टुरिनमा बुधबार राति भएको निकै नै प्रतिस्पर्धात्मक खेलमा घरेलु टोलीले २३ मिनेटभित्र दुई गोलको अग्रता लिएपनि निर्धारित समयभित्र त्यसलाई जोगाउन नसक्दा खेल अतिरिक्त समयमा धकेलिएको थियो ।
दोस्रो मिनेटमा डिजान कुलुसेभ्स्कीले जर्जियो चिलियानीको पासमा गोल गर्दै युभेन्टसलाई अग्रता दिलाएका थिए । २३औं मिनेटमा अल्भारो मोराटाले कुलुसेभ्स्कीको पासमा गोल गर्दै युभेन्टसलाई २–० को अग्रता दिलाएका थिए ।
२८औं मिनेटमा लेननार्ट सिबोराले इडोआर्डाे गोल्डानिगाको पासमा गोल गर्दै खेललाई २–१ को अवस्थामा ल्याए । ७४औं मिनेटमा फिलिपो मेलेगोनीले पाओलोको पासमा गोल गर्दै खेललाई निर्धारित समयमा २–२ गोलको बराबरीमा ल्याए ।
निर्धारित समयको थप गरिएको १५औं मिनेटमा अर्थात १०५औं मिनेटमा हम्जा राफियाले गोल गर्दै युभेन्टसलाई ३–२ को जित दिलाए । उनले अल्भारो मोराटाको पासमा गोल गरेका थिए । उनी ७७औं मिनेटमा मानोलो पोर्टानोभाको स्थानमा मैदान छिरेका थिए । यस खेलमा प्रशिक्षक आन्द्रे पिर्लाेले टोलीका सुपरस्टार फरवार्ड क्रिस्टियानो रोनाल्डोलाई ८८औं मिनेटमा मैदान छिराएको थियो ।
