“म क्रिस्टियानो रोनाल्डोसँग खेल्न चाहन्छु”

पिएसजीका ब्राजिलियन स्टार नेमारले युभेन्टसका सुपरस्टार क्रिस्टियानो रोनाल्डो सँग खेल्ने आफ्नो इच्छा व्यक्त गरेका छन्।

हालै नेमारले पिएसजी सँग आफ्नो सम्झौता विस्तार गरेका छन् भने युभेन्टसको फम खराब हुँदै गर्दा अर्को सिजन च्याम्पियन्स लिग गुमाउने खतरामा रहेको युभेन्टसलाई रोनाल्डोले छोड्ने धेरै चर्चा रहेको छ। रोनाल्डोको अर्को गन्तव्य पिएसजी हुन सक्ने धेरै चर्चा हुँदै गर्दा नेमारले आफू रोनाल्डोको साथ खेल्न इच्छुक रहेको बताए।

नेमारले बार्साका सुपरस्टार मेस्सीको साथ पनि खेलेका छन् भने हाल उनले रोनाल्डो सँग खेल्ने आफ्नो इच्छा व्यक्त गरेका छन्।

“म क्रिस्टियानो रोनाल्डोसँग खेल्न चाहन्छु,” नेमारले जीक्यू फ्रान्सलाई भने।

“मैले पहिले नै मेस्सी र [काइलियन] एम्बाप्पे जस्तो महान् खेलाडीहरूसँग खेलेको छु, तर मैले अहिलेसम्म क्रिस्टियानो रोनाल्डोको साथ खेलेको छैन।”

उक्त अन्तर्वार्तामा उनले आफ्नो रोनाल्डो सँग खेल्ने इच्छा खुलाए भने ब्राजिल सँग विश्व कप सफलता पनि आफ्नो सपना रहेको उनले बताए।

“म विश्व कप जित्न चाहन्छु,” नेमारले भने। “यो सधैँ मेरो सबैभन्दा ठुलो सपना रहेको छ, तर म पिएसजी सँग पनि सबै चीज जित्न चाहन्छु।

“म अहिले करिब ३० वर्ष पुगेको छु र व्यक्तिगत स्तरमा मेरो राम्रो क्यारियर रहेको छ।”