युइएफए च्याम्पियन्स लिग अन्तर्गत बुधबार राती भएको खेलमा इङलिस क्लब म्यान्चेस्टर सिटी र चेल्सी दुबैले जित निकालेको छ ।
म्यान्चेस्टर सिटीले सेभियामाथि ३-१ को जित दर्ता गरेको हो भने चेल्सीले डिनामो जाग्रेबबिरुद्ध २-१ को जित हासिल गरेको हो ।
सेभियाले खेलमा सुरुवाती अग्रता लिएको थियो । खेलको ३१ औं मिनेटमा मिरले गोल गर्दै सेभियालाई अग्रता दिलाएको थियो ।
सिटीका लागि १७ वर्षिय युवा खेलाडी लेविसले ५२ औं मिनेटमा बराबरी गोल गरे ।
७३ औं मिनेटमा अल्भारेजले गोल गर्दै सिटीलाई २-१ को अग्रता दिलाए । ८३ औं मिनेटमा माह्रेजले गोल गर्दै ३-१ को जित दिलाए ।
सिटी यस अघि नै शीर्ष स्थानमा रहन सफल भैसकेको थियो । सेभिया भने तेस्रो स्थानमा रह्यो ।
त्यस्तै, अर्को इङलिस क्लब चेल्सीले साथौ मिनेटमा गोल खाएपनि पछि पुनरागमन जित निकाल्न सफल भयो । पेट्कोभिकले डिनामो जाग्रेबलाई साथौ मिनेटमा गोल गर्दै अग्रता दिलाएको थियो ।
१८ औं मिनेटमा चेल्सीका स्टर्लिङले गोल गर्दै बराबरीमा ल्याए । ३० औं मिनेटमा जाकारीयाले गोल गर्दै चेल्सीलाई २-१ को जित दिलाए ।
जितसंगै चेल्सी शीर्ष स्थानमा रह्यो भने जाग्रेब पुछारमा रह्यो ।
