म्यान्चेस्टर सिटीको लज्जास्पद हार, लेस्टरको अबिस्वास्निय पुनरागमन

इंग्लिस प्रिमियर लिगमा लेष्टर सिटीले लगातार तेस्रो जित निकालेको छ ।

आइतबार राति म्यानचेस्टर सिटीलाई ५-२ गोल अन्तरले पराजित गर्दै लेष्टरले तेस्रो जित निकालेको हो ।

सिटीको मैदानमा एक गोलको अग्रता उल्टाएर लेष्टरले जित निकालेको हो ।

लेष्टरलाई जित दिलाउन जेमी भार्डीले ह्याट्रिक गरे । यस्तै जेम्स म्याडिसन र युरी टेलिमान्सले एक एक गोल गरे ।

सिटीका लागि रियाद महरेज र नाथन एकेले एक एक गोल फर्काए ।

इतिहाद स्टेडियममा चौंथो मिनेटमा महरेजले गोल गर्दै सिटीलाई १-० को अग्रता दिलाएका थिए ।

तर, ३७ औं मिनेटमा भार्डीले पेनाल्टीमा गोल गर्दै लेष्टरलाई १-१ गोलको बराबरीमा फर्काए । सिटीका डिफेन्डर केली वाल्कर पेनाल्टी क्षेत्रमा भार्डीलाई फउल गरेपछि लेष्टरले पेनाल्टी पाएको थियो ।

खेलको ५४ औं मिनेटमा भार्डीले व्यक्तिगत दोस्रो गोल गर्दै लेष्टरलाई २-१ को अग्रता दिलाए ।

खेलको ५८ औं मिनेटमा भार्डीले पेनाल्टीबाट तेस्रो गोल गर्दै ह्याट्रिक पुरा गर्दा लेष्टर ३-१ ले अघि रह्यो। सिटीका एरिक ग्रासियाले पेनाल्टी क्षेत्रमा सोयुन्कुलाई फउल गरेपछि लेष्टर पेनाल्टी पाएको थियो ।

खेलको ७७ औं मिनेटमा म्याडिसनले गोल गर्दै लेष्टरलाई ४-१ को अग्रता दिलाए ।

खेलको ८५ औं मिनेटमा सिटीका नाथन एकेले गोल गर्दै सिटीलाई ४-२ स्थितिमा ल्याए ।

त्यसपछि खेलको ८८ औं मिनेटमा टेलिमान्सले पेनाल्टीमा गोल गर्दै लेष्टरलाई ५-२ को सानदार जित दिलाए ।

सिटीका बेन्जामिन मेन्डीले म्याडिसनलाई पेनाल्टी क्षेत्रमा फउल गरेपछि लेष्टरले तेस्रो पटक पेनाल्टी पाएको थियो ।

जितसँगै लेष्टरले ३ खेलमा ९ अंक जोडेको छ । र, लेष्टर तालिकाको शीर्ष स्थानमा उक्लिएको छ ।