इंग्लिस फुटबल लिग कप आराबओ कप अन्तर्गत म्यानचेस्टर सिटीले फाइनलमा स्थान बनाएको छ ।
बुधबार भएको ‘म्यानचेस्टर डर्बी’मा पराजित भएपनि सिटी उपाधि नजिक पुगेको हो ।
आफ्नै मैदानमा भएको उक्त म्याचेस्टर डर्बीमा सिटी युनाइटेडसँग १–० गोलले पराजित भएको थियो ।
तर, अघिल्लो लेगमा ३–१ गोलको जित निकालेका कारण समग्रमा ३–२ को नतिजासहित सिटी फाइनलमा पुगेको हो ।
अब सिटीले फाइनलमा एस्टोन भिल्लासँग खेल्नेछ । यो खेल १ मार्चमा हुनेछ ।
बुधबार राति भएको डर्बीमा सिटीलाई हराउन नेमान्जा म्याटिकले निर्णायक गोल गरे । उनले खेलको ३५औं मिनेटमा गरेको गोल नै युनाइटेडलाई जिताउन निर्णायक गोल बन्यो ।
तर, खेलको ७६औं मिनेटमा उनले रातो कार्ड पाएपछि युनाइटेड १० खेलाडीमा सीमित बनेको थियो ।
