गुठी विधेयकविरुद्ध संयुक्त प्रतिरोध कार्यक्रमले बुधबार काठमाडौंको माइतीघर मण्डलामा खबरदारी सभा गर्दै छ ।सरकारले गुठी विधेयक फिर्ता लिए पनि गुठीको परम्परा र सम्पदामा सरोकारवालाको स्वामित्व,अधिकार सहभागिताका लागि खबरदारी गर्न खबरदारी सभा गर्न लागिएको आयोजकको भनाइ छ । सम्पदाप्रेमीहरुले गुठीसम्बन्धी विधेयक फिर्ता हुनुलाई आंशिक सफलतासमेत भनेका छन्।
संयुक्त प्रतिरोध कार्यक्रमका संयोजक महेशमान श्रेष्ठले विज्ञप्ति जारी गर्दै आज माइतीघर मण्डलमा खबरदारीसहितको जनप्रदर्शन गर्ने बताएका छन् । उनले प्रधानमन्त्री केपी शर्मा ओलीले गुठी आन्दोलनका विषयमा प्रयोग गरेको भाषा भने मर्यादित नभएको विज्ञप्तिमा उल्लेख गरेका छन् ।
गुठी विधेयकको विरोधमा आन्दोलन चर्किएपछि सरकारले विधेयक फिर्ता लिएको हो । सरोकारवालाले राजधानीमा आज विशाल प्रदर्शन गर्ने तयारी गरिरहेका बेला सरकार पछि हटेको हो ।
आज बुधबार माइतीघर मण्डलामा बिहान ११ बजे खबरदारी सभा हुने जानकारी प्रेस बिज्ञप्ति मा दिएको छ।
