मनाङ र हिमालयन शेर्पाका खेलाडीहरुबीच मैदानमै हानाहान

सशस्त्र प्रहरीको मुख्यालय हलचोक मैदानमा भएको मनाङ र हिमालयनबीच भएको खेलको ७०औं मिनेटमा खेलाडीहरुबीच मैदानमै हानाहान भएपछि रेफ्रीले मनाङका मुहम्मद आसिफ र हिमालयनका विश्वासलाई रातोकार्ड देखाएका थिए । बुधबार १२औं चरणको खेलमा मनाङले हिमालयन शेर्पा क्लबमाथि २–१ कै जित निकाल्यो ।

सशस्त्र प्रहरीको मुख्यालय हलचोक मैदानमा भएको खेलमा मनाङका लागि ३६औं मिनेटमा अफिज ओलावाले र ६४औं मिनेटमा विशाल राईले एक/एक गोल गरे । हिमालयनका विश्वास श्रेष्ठले ४५औं मिनेटमा एक गोल गरेका थिए ।

खेलको ७०औं मिनेटमा खेलाडीहरुबीच मैदानमै हानाहान भएपछि रेफ्रीले मनाङका मुहम्मद आसिफ र हिमालयनका विश्वासलाई रातोकार्ड देखाएका थिए । जितले च्याम्पियन मनाङको ३६ अंक भएको छ भने हारले हिमालयन शेर्पा १७ अंकबाट सातौं स्थानमै खुम्चिएको छ ।

जारी लिगका अन्तिम चरणका खेलहरु शनिबारदेखि हुने भएका छन् । संकटा क्लब सहिद स्मारक ‘ए’ डिभिजन लिग फुटबलको उपविजेता बन्न सफल भएको छ ।

बुधबार प्रतिस्पर्धी थ्रीस्टार क्लबलाई २–१ ले पराजित गर्दै संकटाले एक खेलअघि नै दोस्रो स्थान पक्का गरेको हो । एन्फा कम्प्लेक्स सातदोबाटोमा भएको १२औं चरणको खेलमा थ्रीस्टारले ३०औं मिनेटमा रन्जन बिष्टको गोलबाट प्रारम्भिक अग्रता लिएपनि खेलाडीहरुले अनुशासन गुमाउँदा अग्रता टिकाइराख्न सकेन ।

संकटाले दुवै गोल पेनाल्टीमार्फत् गरेको हो । दुवै गोल अमित तामाङले गरेका हुन् । जितले उपविजेता संकटाको २८ अंक भएको छ भने पराजित थ्रीस्टार २३ अंकबाट तेस्रो स्थानमै छ ।
चौथो स्थानको त्रिभुवन आर्मी क्लबको २२ अंक हुँदा तेस्रो स्थानको भिडन्त अन्तिम खेलबाटै टुंगो लाग्नेछ ।