बार्सिलोनालाई बराबरीमा रोक्दै टोटेनहम अर्को चरणमा प्रवेश

टोटेनहम हट्स्परले बार्सिलोनालाई उसको घरेलु मैदान क्याम्प नोउमा १-१ को बराबरीमा रोक्दै युरोपेली च्याम्पियन्स लिगमा दोस्रो चरणको यात्रा तय गरेको छ ।

समूहको सुरुवाती तीन खेलमा जम्मा १ अंक जोडेको टोटेनहमले त्यसयता लगातार दुई जित र मंगलबारको खेलमा बार्सिलोनालाई बराबरीमा रोक्दै अन्तिम १६ मा स्थान बनाएको हो । समूहको अर्को खेलमा इन्टर मिलान र पीएसभीले पनि समान १-१ को बराबरी खेलेपछि टोटेनहम दोस्रो चरणमा पुगेको हो ।

ओस्मान डेम्बेलेले खेलको सातौं मिनेटमा गोल गर्दै घरेलु टोलीलाई अगाडी बढाएका थिए । तर टोटेनहमले लगातार आक्रमण गर्दै बार्सिलोनाको डिफेन्सलाई समस्यामा पारेको थियो । ह्यारी केन र ह्युङ मिन सनले पहिलो हाफमा प्राप्त अवसर सदुपयोग गर्न सकेनन् । दोस्रो हाफमा लुका मौराको हेडर पनि बार्सिलोना डिफेन्सले गोललाइनबाट क्लियर गरेका थिए ।

मोउराले खेलको ५ मिनेट समय बाँकी हुँदा गोल गर्दै टोटेनहमलाई दोस्रो चरणमा पुग्ने आशा जगाएका थिए । त्यसअघि बार्सिलोनाका दोस्रो रोजाईका गोलरक्षक जास्पर सिलेसनले लगातार उत्कृष्ट बचाउ गर्दै टोटेनहमलाई बराबरी गोल गर्नबाट रोकेका थिए । उनले मोउराको प्रहार बचाउनुका साथै सन र क्रिस्टियन एरिक्सनको प्रहारलाई पनि गोल हुनबाट रोकेका थिए । तर ८५ औं मिनेटमा केनको क्रसमा मोउराको फस्ट टच फिनिसले गोलको दिशा लियो ।

प्रतियोगिताको पहिलो खेलमा इन्टरसँग २-१ ले पराजित भएको टोटेनहम दोस्रो खेलमा बार्सिलोनासँग घरेलु मैदानमा ४-२ ले पराजित भएको थियो । तेस्रो खेलमा पीएसभीसँग २-२ को बराबरीमा रोकिएपनि चौथो खेलमा पीएसभीलाई हराएपछि केहि आशा जागेको थियो । इन्टरलाई घरेलु मैदानमा १-० ले हराउँदै टोटेनहम अर्को चरणमा पुग्ने समीकरण निस्केको थियो । इन्टरले पीएसभीसँग १-१ को बराबरी खेलेपछि युरोपा लिगमा झरेको छ ।

बार्सिलोनाले यस नतिजासंग च्यान्म्पियाँस लिगमा घरेलु मैदानमा अपराजित यात्रालाई २९ खेलसम लम्ब्याएको छ । पछिल्लो २९ खेलमा बार्सिलोनाले २६ जित र ३ बराबरी खेलेको छ । यो कीर्तिमान सन् २००२ अप्रिलमा बायर्नले कायम गरेको थियो । टोटेनहम भने च्याम्पियन्स लिगमा चार पटक खेल्दा तेस्रो पटक अन्तिम १६ मा प्रवेश गर्न सफल भएको छ ।

ह्यारी केनले च्याम्पियन्स लिगमा खेलेका १६ खेलमा १३ गोल र ३ असिस्ट प्रदान गरेका छन् । यता ओस्मान डेम्बेलेले पनि घरेलु मैदानमा खेलका पछिल्ला तीनै खेलमा गोल गरेका छन् ।

समूहबाट बार्सिलोना समूह विजेता र टोटेनहम समूह उपविजेताको रुपमा अर्को चरण प्रवेश गरे । बार्सिलोनाको ६ खेलमा ४ जित र २ बराबरीसँगै १४ अंक रहेको छ । टोटेनहम र इन्टर मिलनले ६ खेलमा समान २ जित, २ बराबरी र २ हारसँगै ८ अंक जोड्यो । हेड टु हेडमा टोटेनहम अवे गोलमा अगाडी रहँदै दोस्रो चरणको यात्रा तय गर्न सफल रहयो । पुछारमा ६ खेलमा २ अंक जोडेको पीएसभी रहेको छ ।