नेपाल क्रिकेट प्रशिक्षक पटवालसँग स्पष्टीकरण लिनुपर्छ : टमाटा

नेपाल विश्व ट्वान्टी–२० एसिया छनोटमा पूर्ण रूपमा चुकेको र त्यसको जिम्मेवारी व्यवस्थापन पक्षले लिनुका साथै प्रशिक्षक उमेश पटवालको भनाइमा राष्ट्रिय खेलकुद परिषद्ले स्पष्टीकरण लिनुपर्ने पूर्व प्रशिक्षक जगत टमाटाले बताएका छन्  । सिंगापुरमा भएको विश्व ट्वान्टी–२० एसिया छनोटमा प्रमुख दाबेदार नेपाल ५ राष्ट्र सहभागी प्रतियोगितामा तेस्रो भएको थियो  ।

आफूभन्दा निकै कमजोर मानिएका टोली कतार र सिंगापुरसँगको हारपछि नेपाल अक्टोबर–नोभेम्बरमा यूएईमा हुने ग्लोबल छनोटमा पुग्न असफल रह्यो ।

राउन्ड रोबिन प्रतियोगिताको अन्तिम दिन आइतबार नेपाल जित्नैपर्ने खेलमा सिंगापुरसँग ८३ रनले पराजित भएको थियो । सिंगापुरसँग सबै फर्म्याटमा नेपालको यो पहिलो हार थियो । सिंगापुरसँगको हार ट्वान्टी–२० अन्तर्राष्ट्रियमा रन अन्तरमा नेपालको दोस्रो ठूलो हार पनि हो ।

‘हामी ग्लोबलमा खेल्न लायक टोली होइनौं । यहीं सफल हुन सकनौं, त्यसैले त्यहाँ नपुगेकै ठीक भयो । यो हामीले स्वीकानुपर्छ । हामीसँग योजनाहरू थिए तर मैदान सफल हुन सकेनौं,’ सिंगापुरसँगको हारपछि प्रशिक्षक पटवालले नेपाली सञ्चारमाध्यमसामु यस्तो धारणा राखेका थिए । दुई महिनाअघि आफ्नो स्थानमा नेपालको प्रमुख प्रशिक्षक बनेका पटवालको यो भनाइप्रति टमाटाले कडा प्रतिवाद गरे ।

‘पटवालको यो भनाइबाट म निकै असन्तुष्ट छु । उहाँले विगतमा हामीसँगै टिममा बसेर ब्याटिङ परामर्शदाताको रूपमा काम गर्नुभएको थियो । भर्खरै मात्र नेपाली टोलीको जिम्मेवारी पाउनु भए पनि हाम्रो खेलाडीको शक्ति कति हो भने उहाँलाई थाहा छ,’ टमाटाले कान्तिपुरसँग भने, ‘जब उहाँले नेपाली टोलीको जिम्मेवारी पाउनुभयो, उहाँले टोली राम्रो छ र एसिया छनोट सजिलै पार गर्छ भनेर भनेको थिएँ । हामीले २०१४ को ट्वान्टी–२० विश्वकप पनि खेलेका छौं । पछिल्लो वर्ष विश्वकप छनोट हुँदै एकदिवसीय मान्यता पाइसकेका छौं, अहिले आएर हामी कसरी त्यो स्तरको भएनौं ?’

त्यसैले यो भनाइका लागि पटवालसँग नेपाल क्रिकेट संघ (क्यान) निलम्बन रहेको अवस्थामा परिषद्ले स्पष्टीकरण माग्नुपर्ने जनाउँदै टमाटाले अगाडि भने, ‘उनले जिम्मेवारी लिँदै विश्वास नलागेको भए यो टोली त्यहाँसम्म पुग्ने खाले छैन भनेर भन्नुपर्थ्यो । त्यो पनि भनेको छैन । यो टोली राम्रो छ र विश्वकपमा पुर्‍याएर ल्याउँछु भन्नुभएको थियो । टिम हारिसकेपछि चाहिँ ग्लोबल छनोट खेल्न योग्य थिएनभन्दा टिममाथि डोमिनेन्ट गरे जस्तो लाग्यो । नेपाली टोलीमा उहाँको घुलमिल राम्रो छ, योग्य प्रशिक्षक हुनुहोला तर हारपछि जे भनाइ उहाँको छ त्यो निकै दुःखलाग्दो छ ।’

पटवाल गत वर्षको मार्चमा जिम्बावेमा सम्पन्न विश्वकप छनोटकोअघिदेखि नेपाली टोलीको ब्याटिङ परामर्शदातामा रहँदै आएका थिए । यसबीचमा उनी नेपालका फ्रेन्चाइज क्रिकेटहरूमा पनि आबद्ध थिए । पहिलो जिम्मेवारीमा उनी असफल भएपछि पटवालको क्षमतामाथि पनि प्रश्न उठेको छ । निर्णायकसिद्ध सिंगापुरसँगको खेलमा कप्तान पारस खड्का र सन्दीप लामिछाने चल्न नसक्दा ‘म्याच विनर’ नभएकाले पनि हारको कारण रहेको पटवालले जनाएका थिए ।

‘हामीले लगातार तीन ग्लोबल छनोट खेलेका छौं, उहाँले कसरी त्यो भन्नुभयो त्यसमा म अचम्भित छु । उहाँले आफ्नो जिम्मेवारी बुझ्नुपर्‍यो, मेरो टोली हो भनेर लिनुपर्‍यो । उनले टोली नै खराब छ भने पनि अर्को पटक राम्रो खेल्नुपर्छ भनेर हौस्याउने हो । आजको दिनमा पारसलाई यसरी ब्याटिङ गर भनेर सिकाउन जरुरी छैन, उनीहरू जस्ता अनुभवी खेलाडीलाई मेन्टली एप्रोच दिनुपर्छ, योजनाहरू सुनाउनुपर्छ,’ टमाटाले भने, ‘पारस १७ वर्षदेखि खेलिरहेका छन्, एक दुई महिनामा उसको स्किल परिवर्तन गर्न सकिँदैन ।’

टमाटाले सबै प्रशिक्षकको मूल्यांकन उसले दिएको नतिजाले हुने र प्रशिक्षकमा कुनै जादू नहुने पनि बताए । ‘नतिजा दियो भने प्रशिक्षक सक्षम हुन्छ, होइन भने उसको आलोचना सुरु भइहाल्छ । मैले पटवालको आलोचना गर्न खोजेको होइन तर उहाँले नेपाली टोलीको क्षमतामाथि जुन प्रश्न गर्नुभयो त्यसले दुःखी बनाएको छ,’ ग्लोबलमा छनोट नहुनु ठूलो धक्का भएको बताउँदै टमाटाले भने, ‘नेपाली क्रिकेटका लागि यो ठूलो झट्का हो । यो टोलीका धेरै खेलाडीको उमेर ढल्किरहेको छ । अब उनीहरूले खेल्ने कि नखेल्ने प्रश्न उठ्छ । हामीसँग तुरुन्त नयाँ खेलाडी छैन । यसलाई कसरी माथि लिएर जाने चुनौती छ । सबैभन्दा ठूलो हामीसँग संघ नै छैन ।’

तीन वर्ष नेपालका प्रमुख प्रशिक्षक रहेका टमाटाले ग्लोबल छनोटमा पुग्न नसकेकोमा व्यवस्थापनप्रति पनि प्रश्न उठाए । खेलाडीबाहेक नेपाली टोलीमा प्रशिक्षक, व्यवस्थापक एवं टेक्निकल एनालिस्ट रमन सिवाकोटी र फिजियोमा दिनेश भट्टमात्र थिए । विगतमा नेपाली टोलीसँग ट्रेनर सुवास पात्रो पनि रहन्थे । यसपालि उनीबिनै नेपाली टोली सिंगापुर पुगेको थियो । क्यानलाई तीन वर्षदेखि अन्तर्राष्ट्रिय क्रिकेट परिषद् (आईसीसी) ले निलम्बन गरेको छ । आईसीसीले तोकेको मापदण्डअनुरुप नेपाललाई खेलाडी र सीमित प्रशिक्षण टोलीबाहेक अन्यलाई समेट्न कठिन बनेको थियो । प्रशिक्षण टोली थप्न नसकेकोमा व्यवस्थापकीय कमजोरी रहेको उनी बताउँछन् ।

‘हामीलाई आईसीसीले मुख्य प्रतियोगितामा प्रशिक्षक, व्यवस्थापक र फिजियो मात्र दिएको छ । ट्रेनर पनि दिएको छैन । बलिङ प्रशिक्षक वा सहायक प्रशिक्षक पनि छैन । नदिए पनि माग्नुपर्ने हो । अरु टोलीको ५ जनासम्म प्रशिक्षण टोली देखिएको थियो । व्यवस्थापनको पनि कमजोरी देखियो, जसले यो सम्हालिरहेको छ उसको पनि यो जिम्मेवारी हो,’ टमाटाको आक्रोश थियो, ‘सबै हामीले आईसीसीको मुख ताकेर हुँदैन । पछिल्लो पटक दुबई जाँदा पनि हामीलाई यस्तै गरेको थियो आईसीसीले । हामीले राखेपलाई अनुरोध गरेर ट्रेनर हालेका थियौं । तीन सातासम्म नेपाली टोलीको भ्रमणमा ट्रेनर आवश्यक नै पर्दैन र ? सहायक प्रशिक्षक चाहिँदैन ? यसमा पनि हामी चुकेका छौं ।’

सिंगापुर अनुरुप नेपालको तयारी नभएको दाबी टमाटाको थियो । ‘हामी वरीयतामा उनीहरू माथि हौंला, स्तरमा पनि माथि हौंला । तर सिंगापुरको तयारीलाई हामीले नजिकबाट नियाल्न सकेनौं । हुन त हामीसँग पनि बिग–बासमै खेलेका सन्दीप लामिछाने छ, सिंगापुरले पनि बिग–बासमा खेलेको टिमोथी डेविडलाई यही प्रतियोगिता भनेर ल्याएको थियो । ट्वान्टी–२० मा एकै खेलाडीले धेरै फरक पार्छ । तर हाम्रा बलरहरूले आफ्नो शक्तिअनुरुप केही गर्न सकेनन्,’ टमाटाले भने, ‘उनीहरूले निकै राम्रो तयारी गरेका थिए ।

मलेसियामा तय हुने भएको प्रतियोगिता सिंगापुरले मागेर ल्याएका थिए । त्यहीअनुरुप उनीहरूले आफू सुहाउँदो विकेट बनाएर तयारी गरे । पाकिस्तानमा लगातार अभ्यास म्याच खेले । हामीले पनि मलेसियामा तयारी गर्नु राम्रै हो । तर मलेसियाको घाँसे विकेट हुन्छ, सिंगापुरमा फ्ल्याट विकेट थियो । मुख्य भनेको हामीले आफ्नो स्तरअनुरुप पनि खेल्न सकेनौं ।’

@Kantipur