नेपालले बंगबन्धु गोल्ड कप नखेल्ने सम्भावना!

 

बंगलादेश फुटबल संघको आयोजनामा अर्को महिना हुने बंगबन्धु गोल्ड कपको आयोजना मिति र समूह विभाजन तय भइसकेको छ ।  तर प्रतियोगिता अाउन दुई सातामात्रै बाँकी हुँदा पनि नेपालको सहभागिता हुने-नहुने टुंगो लागेको छैन ।

साविक विजेता समेत नेपाल समूह ‘ए’मा प्यालेस्टाइन र ताजकिस्तानसँग रहेको छ । अर्को समूहमा आयोजक बंगलादेश, फिलिपिन्स र लाओस रहेका छन् । बंगबन्धु गोल्डकप असोज १४ देखि २६ गतेका लागि तय भएको छ । यसैबीच, एन्फाले ५ वर्षयता पहिलो पटक असोज १३ गते देखि ए डिभिजिन लिग आयोजना गर्ने घोषणा गरेको थियो । हालसम्म लिगबारे एन्फाले सोहि मिति अनुसार तयारी अघि बढाइरहेको छ ।

यति लामो प्रक्रिया अघि बढ्दा पनि नेपालको सहभागिता बंगबन्धुमा रहन्छ रहँदै भन्ने अझै निश्चित हुन सकेको छैन । नेपालको सहभागिता अनिश्चित हुनुको मुख्य कारण यसअघि च्याम्पियन बन्दाको पुरस्कार राशी पुरा नपाउनु हो । २०७२ को माघ मा च्याम्पियन बनेको नेपालले ५० हजार अमेरिकी डलर पाउने बताइएको थियो । तर, अखिल नेपाल फुटबल संघ (एन्फा) ले आधा रकम २५ हजार डलर मात्र प्राप्त गरेको बताएको छ ।

ढाकामा जारी साफ च्याम्पियनसिपका दौरान त्यहाँका सञ्चारकर्मीको चासो नेपालले बंगबन्धुमा भाग लिन्छ की लिदै भन्ने रह्यो । बंगलादेशको जमुना टेलिभिजनलाई दिएको अन्तवार्तामा एन्फाका उपाध्यक्ष कृष्ण थापाले पुरस्कारको आधा रकम पाउन बाँकी रहेको र त्यो नपाउँदा सम्म बंगबन्धुको सहभागिता भने ग्यारेन्टी गर्न नसकिने बताएका थिए ।

तर, बंगलादेश फुटबल संघका अध्यक्ष काजी सलाउद्दीनले पुरस्कार राशीका बारेमा सोधिएको प्रश्नमा पैसा पुरा दिए नदिएको भन्दा पनि वकवास भनेका छन् । सलाउद्दीन दक्षिण एसियाली फुटबल महासंघ (साफ) का पनि अध्यक्ष हुन् । पुरस्कार रकम पूर्ण रुपमा प्राप्त नभएसम्म बंगबन्धुमा भाग नलिने एन्फाले बताउँदै आएको छ ।

पुरस्कार रकम आउन ढिला भएपनि एन्फाले बंगबन्धुका विजेतालाई त्यहि समय जनही ५ लाख रुपैयाँले सम्मान गरेको थियो । साविक विजेता समेत रहेको नेपाललाई खेलाउन बंगलादेशले हरसम्भव प्रयास गरिरहेको बताइएको छ ।

बंगालदेश फुटबल संघ पुरस्कार राशी छिट्टै उपलब्ध गराएर पनि वातावरण बनाउने तयारीमा जुटेको बुझिएको छ । एन्फाका अर्का उपाध्यक्ष वीरबहादुर खड्का र महासचिव इन्द्रमान तुलाधर यति बेला बंगलादेशमै रहेकाले बंगबन्धुमा नेपालको सहभागिताका बारेमा थप प्रष्ट हुने विश्वास गरिएको छ ।