नेपालले पाएको दोस्रो स्थानको पदक गर्न पर्यो फिर्ता – नेपाल टिम थप लज्जित

pic by WicketNepal

सिंगापुरसँग पराजित भएपछि नेपाल आईसीसी टि-२० विश्वकप २०२० एसिया क्षेत्र छनोटमा दोस्रो भएको थियो र नेपाल टिमले पदक पनि पाएको थियो तर कतारभन्दा रनरेटमा पछाडी परेपछि नेपाल तेस्रो स्थानमा झरेको छ र नेपालले आफ्नो पदक फिर्ता गरेको छ।

टि-२० विश्वकप छनोटको अन्तिम खेलमा नेपाल र सिंगापुरबीच विजयी हुने दोस्रो चरणमा पुग्ने थियो र सिंगापुरसँग पराजित भएपछि नेपालको विश्वकप सपनामा पूर्ण बिराम लागेको थियो । नेपाल ८१ रनले पराजित भएपछि रनरेटका आधारमा कतारभन्दा पछाडी रहन पुग्यो, आयोजक सिंगापुर क्रिकेट संघले पनि नेपाल नै दोस्रो भएको ठान्दै दिएको पदक नेपाली टोलीले फिर्ता गरेको हो ।

समापन समारोहमा नेपाललाई उपविजेता घोषणा गरेपछि कतारका व्यवस्थापकले विरोध गरेका थिए । सिंगापुरलाई जस्तै नेपाली टोलीलाई भने यसबारे जानकारी थिएन । पछि नेपाली टोली आफैंले पदक फिर्ता गरेको थियो । नेपाली टोलीका व्यवस्थापक रमण शिवाकोटीले संघका प्रमुख कार्यकारी अधिकृत साद खानलाई पदक हस्तान्तरण गरे ।

घरेलु टोली सिंगापुर ४ खेलमा ३ मा जित सहित शीर्ष स्थानमा रहेर च्याम्पियन बनेको हो । एक खेल वर्षाको कारण रद्द भएको थियो । कतारले ४ खेलमा समान २ मा हार र जितका साथ ४ अंक जाड्दै दोस्रो बन्यो । नेपालले पनि ४ खेलमा समान २ मा जित र हारका साथ समान ४ अंक जोडेपनि नेट रन रेटमा पछि पर्दै तेस्रो बन्न पुग्यो । कुवेत चौथो र मलेसिया पाँचौ स्थानमा रहे ।

नेपालले पहिलो खेल कतारसँग ४ विकेटले हारेको थियो । मलेसिया र कुवेतलाई ७ विकेटले पराजित गरेपनि अन्तिम खेलमा सिंगापुरसँग पराजित हुँदा नेपाल एसिया छनोटबाटै बाहिरिनु परेको हो ।