दशरथ रंगशालामा हुने विश्वकप छनोट खेल सर्ने

Nepal's national football team pose for a portrait prior to their game against Chinese Taipei on Tuesday, September 10, 2019. Courtesy: Suman Chapagain

दशरथ रंगशालामा आगामी चैत १३ र १८ गतेका लागि तय भएको सन् २०२२ को फिफा विश्वकप छनोट खेल सर्ने भएको छ । कोरोना भाइरसको संक्रमण र त्रासका कारण छनोट खेल सर्ने सम्भावना रहेको अखिल नेपाल फुटबल संघ (एन्फा )ले जनाएको छ ।

नयाँ मितिबारे अन्तिम निर्णय भने हुन बाँकी छ । यसअघि नेपालले चैत १३ गते चाइनिज ताइपेइ र १८ गते अष्ट्रेलियासँग खेल्ने तय भएको थियो । मिति परिवर्तन गर्न अष्ट्रेलियाले एसियाली फुटबल महासंघ (एएफसी) मा निवेदन दिई सकेको छ । अष्ट्रेलियाले आफ्ना नागरिकलाई देश बाहिर नजान आग्रह पनि गरेको छ ।

चाइनिज ताइपेइले खेल सार्ने विषयमा केही नबताएपनि विश्व फुटबल महासंघ (फिफा) र एएफसीलेनै छनोट खेलको नयाँ तालिका तय गर्ने विषयमा छलफल गरिरहेको छ ।

विश्वकपका छनोट खेलका लागि नेपाली फुटबल टोलीले प्रशिक्षण भने सुरु गरिसकेको छ । विश्वकप अन्तर्गत नेपालले खेल्ने आठ खेलमध्ये पाँच खेल खेलिसकेको छ । बाँकी तीन खेल दशरथ रंगशालामा हुनेछ । नेपालले यसअघिका खेलमा चाईनिज ताईपेइलाई मात्र २–० गोलले हराएको थियो ।

नेपाल अन्य खेलमा नेपाल पहिलो खेलमा कुवेतसँग ७–० र दोस्रो खेलमा १–० गोलले पराजित भएको थियो । नेपाल अष्ट्रेलियासँगको पहिलो खेलमा ५–० र जोर्डनसँग ३–० गोलले पराजित भएको थियो ।

अहिले समूहमा १२ अंकसहित अष्ट्रेलिया शीर्षस्थानमा छ । कुवेत १० अंकसहित दोस्रो, जोर्डन १० अंकसहित तेस्रो, नेपाल तीन अंकसहित चौथो र अंक विहिन चाइनिज ताइपे पुछारमा छ । कोरोनाका कारण विश्वभर अन्य खेलका अन्तर्राष्ट्रिय गतिविधि समेत रोकिने क्रम बढ्दो छ । विश्वकप छनोट खेल सार्ने विषयका एन्फा अहिले फिफा र एएफसीको निर्णय पर्खेर बसेको छ ।

@Ratopati