जाभीले आफू तत्काल प्रशिक्षक बन्न नसक्ने जवाफ दिएपछि सोमबार बार्सिलोनाको प्रशिक्षण सत्र अर्नेस्टो भाल्भर्डेले नै सञ्चालन गर्ने निश्चित भएको छ । कतारी क्लब अल सादमा प्रशिक्षणरत जाभीले बार्सिलोनाका स्पोर्टिङ डाइरेक्टर एरिक अविडाल र मुख्य कार्यकारी ओस्कार ग्राउसँग शुक्रबार र शनिबार कुराकानी गरेका थिए ।
स्रोतका अनुसार जाभीले तत्काल आफू क्लबसँग सम्झौता गर्न असमर्थ रहेको बताएपछि अविडाल र ग्राउ आइतबार स्पेन फर्किएका छन् । जाभीले आगामी दिनमा यसबारे छलफल गर्ने ढोका भने खुलै राखेका छन् । सम्भवतः उनी यो सिजनको अन्तिममा फर्कन सक्नेछन् ।
Xavi, who lifted 25 trophies in a 17-year career with Barcelona, is currently the head coach of Qatari outfit Al Sadd, but has made no secret of his desire to return to Barcelona in a similar capacity. #LaLigahttps://t.co/LpZfMOphNp
— Firstpost Sports (@FirstpostSports) January 13, 2020
अहिलेसम्म बार्सिलोनाको प्रशिक्षकको रूपमा भाल्भर्डेकै जिम्मेवारी छ र उनले सोमबार बिहान सधैंजस्तै प्रशिक्षण गर्नेछन् । क्लब व्यवस्थापन हात धोएर जाभीको पछि लागेको अवस्थामा नयाँ प्रशिक्षण सत्रमा उनको प्रतिक्रिया कस्तो हुनेछ भन्ने कौतूहल भने यथावत् छ ।
अविडाल र ग्राउले जाभीलाई शुक्रबार भेटेका थिए । शनिबार कतार कपको सेमिफाइनलमा अल रायनलाई पराजित गरेपछि त्यसै रात पुनः उनीहरूबीच वार्ता भएको थियो । जाभीले आइतबार आफ्नो निर्णय दिने बताइएको थियो । तर बार्सिलोनाका यी लोकप्रिय पूर्वमिडफिल्डरले केही समय माग गरेका छन् । उनको स्थिति यसकारणले पनि जटिल छ कि अल सादले कतार कपको फाइनल खेल्दा उनी नेतृत्व लिन चाहन्छन्, जुन खेल १७ जनवरीमा खेलिनेछ । बार्सिलोनाको टिमबाट सिजनको मध्यमा सामेल हुनु एक चुनौतीपूर्ण जिम्मेवारी पनि हो । ला लिगामा बार्सा टिम रियल मड्रिडसँग १ अंकको दूरीमा छ र अर्को महिना च्याम्पियन्स लिगको अन्तिम १६ मा नापोलीको सामना गर्दै छ ।
जाभीले अर्को वर्ष हुन लागेको क्लबको चुनावभन्दा अगाडि अध्यक्षका उम्मेदवार भिक्टर फन्टको अपेक्षासहित राजनीतिक स्थितिबारे पनि विचार गर्नुपर्नेछ ।
‘जाभीका लागि यो निकै कठिन निर्णयको समय हो,’ स्पेनिस अखबार एल पेइसले आइतबारको अंकमा लेखेको छ, ‘यदि उनले स्वीकार गरे भने सन् २०२१ मा हुन लागेको चुनावभन्दा अघि कमजोर नेतृत्वको मातहत काम गर्नुपर्नेछ । तर यदि उनले अस्वीकार गरे भने घर फर्कन अस्वीकार गरेको आरोपमा आलोचना बेहोर्नुपर्नेछ ।’
समाचारहरूमा जनाइएअनुसार जाभीले भालभर्डेप्रति सम्मान देखाउन चाहेका छन् । जसले बार्सिलोनाका लागि पछिल्ला २ सिजनको कार्यकालमा २ ला लिगा उपाधि दिलाएका थिए । तर च्याम्पियन्स लिगमा रोमा र लिभरपुलसँगको पतनलाई बिर्सन सकिँदैन । र, हालैका साताहरूमा देखिएको कमजोर प्रदर्शनले यस्तो अवस्था पुनः दोहोरिने आशंका बढेको छ ।
बिहीबार स्पेनिस सुपर कपको सेमिफाइनलमा बार्सिलोनाले एट्लेटिको मड्रिडसँग ३–२ को हार बेहोरेको थियो । ‘म बार्सिलोनालाई सम्मान गर्छु । म भाल्भर्डेलाई सम्मान गर्छु र म आफ्नो क्लबलाई पनि सम्मान गर्छु जहाँ मैलो आफ्नो जिम्मेवारी पूरा गरिरहेको छु,’ जाभीले शनिबार भनेका थिए, ‘म अहिले अल सादमा आफ्नो ध्यान केन्द्रित गरिरहेको छु । अविडाल मेरामित्र हुन् र उनीसँग मैले धेरैपल्ट भेटघाट गरेको छु । उनीहरू ओस्मान डेम्बेलेको स्वास्थ्य परीक्षणका लागि आएका थिए र मसँगको भेटमा हामीले थुप्रै विषयमा कुरा गरेका छौं ।’ जाभीले बार्सिलोनाको प्रशिक्षक बन्ने आफ्नो सपना पनि दोहोर्याएका थिए ।
३९ वर्षीय जाभीले सन् २०१० मा स्पेनलाई विश्वकपको उपाधि दिलाउन महत्त्वपूर्ण योगदान गरेका थिए । बार्सिलाना एकेडेमीका उत्पादन जाभीले क्लबका लागि सिनियर टिमबाट ८ सय ५५ खेल खेलेका थिए । भावनात्मक बिदाइपछि उनी सन् २०१५ मा कतारी क्लब अल सादमा खेलाडीका रूपमा अनुबन्ध भएका थिए ।
@Kantipur
