विश्वकप छनोट खेलमा जर्मनीको लज्जास्पद हार

फिफा विश्वकप २०२२ को छनोटमा जर्मनी घरेलु मैदानमा नर्थ म्यासेडोनियासँग २–१ ले स्तब्ध बनेको छ ।

जर्मनीलाई स्तब्ध पार्न गोरान पान्डेभ र इल्जिफ इल्मासले गोल गरे । घरेलु टोलीका इल्केए गुन्डोगानले गोल गरेपनि हार टार्न सकेन । २०१४ को च्याम्पियन जर्मनीले विश्वकप छनोटमा २० वर्षपछि पहिलो हार बेहोरेको हो । जर्मनी २००१ मा इंग्ल्यान्डसँग म्युनिखमा ५–१ ले पराजित भएको थियो । त्यसयताको विश्वकप छनोटको ३५ खेलमा जर्मनी अपराजित रहेको थियो ।

डुइसवर्गमा बुधबार राति भएको खेलमा बल पोसेसनमा पकड राखेपनि जर्मनीले पहिलो हाफको इन्ज्युरी समयमा गोल खान पुगेको थियो । पहिलो हाफको इन्ज्युरी समयको थप गरिएको दोस्रो मिनेटमा गोरान पान्डेभले इनिस बार्धीको पासमा गोल गर्दै नर्थ म्यासेडोनियालाई सुरुवाती अग्रता दिलाएका थिए ।

६३औं मिनेटमा इल्केए गुन्डोगानले पेनाल्टीमार्फत गोल गर्दै खेललाई १–१ गोलको बराबरीमा ल्याए । पेनाल्टी बक्समा एलिओस्कीले लिरोए सानेलाई लडाएपछि प्राप्त पेनाल्टीमा गुन्डोगान चुकेनन् । ८५औं मिनेटमा इल्जिफ इल्मासले एरिजान एडेमीको पासमा गोल गर्दै जर्मनीलाई २–१ ले स्तब्ध पारे ।

यो विश्वकप छनोटका खेल प्रशिक्षक जोचिम लोको अन्तिम खेल हो । उनले जुन जुलाईमा हुने युरोकपपछि जर्मनीको प्रशिक्षक छाड्ने घोषणा गरिसकेको छ । उनले जर्मनीको प्रशिक्षकको रुपमा १५ वर्ष बिताएका छन् । विश्वकप छनोटका बाँकी खेलहरु सेप्टेम्वरमा हुनेछ ।

यही समूह ‘जे’ को अर्काे खेलमा अर्मेनियाले १० खेलाडीमा समेटिएको रोमानियालाई ३–२ ले पराजित गर्दै शीर्षस्थानमा उक्लिएको छ ।अर्मेनियाको जितमा इडुआर्ड स्पर्टस्यान, भारजडाट हारोयान र टिगरान बार्सेसगयानले गोल गरे । रोमानियाका एलेसान्द्रु सिकाडाउले दुवै गोल गरेपनि हार टार्न सकेन । जर्ज पुस्कार सिधै रातो कार्ड खादै मैदानमाबाट बाहिरिएपछि रोमानिया ७८औं मिनेटमा १० खेलाडीमा समेटिएको थियो ।

यही समूहको अर्काे खेलमा आइसल्यान्डले लिचेस्टाइनलाई ४–१ ले पराजित गरेको छ । आइसल्यान्डले लगातार सातौ हारपछि जित निकालेको हो । रोमानियालाई २–१ ले पराजित गरेपछि आइसल्यान्डले जित निकाल्न सकेको थिएन । आइसल्यान्डको जितमा बिर्किर साभर्सन, बिर्किर बिजार्सन, भिक्टर पाल्सन र रुनार मार सिगुर जोन्सनले गोल गरे । घरेलु टोलीका यानिक फ्रिकले एक गोल फर्काए ।

यो नतिजापछि समूह ‘जे’ मा अर्मेनिया ३ खेलबाट ३ जितसहित ९ अंक जोडेर शीर्षस्थानमा उक्लिएको छ । समान ६ अंक भएपनि हेड टु हेड र गोल अन्तरमा नर्थ म्यासेडोनिया दोस्रो तथा जर्मनी तेस्रो स्थानमा रहेको छ । समान ३ अंक भएपनि रोमानिया चौथो तथा आइसल्यान्ड पाँचौ स्थानमा रहँदा लिचेस्टाइन अंकविहीन हुदै पुछारमा छ ।