च्याम्पियन्स लिगको खेलको लागि लिभरपूललाई जर्मनी प्रवेशमा निषेध

लिभरपूलले च्याम्पियन्स लिगको राउन्ड अफ १६को पहिलो लेगको खेलको लागि जर्मन क्लब आरबी लाइपजिगको सामना गर्ने छ तर खबर अनुसार लिभरपूलले जर्मनीमा प्रवेश गर्न पाउने छैन।

उक्त खेल रेड बुल एरिनामा १६ फेब्रुअरीमा हुने तालिका थियो तर बेलायतमा फेला परेको नयाँ प्रकारको कोरोना भाइरसको कारण जर्मनीले बेलायतबाट जर्मनी प्रवेशमा प्रतिबन्ध लगाएको थियो।

हाल खबर अनुसार सो प्रतिबन्धबाट फुटबल खेलाडीहरू पनि छुट पाउने छैनन्। खेल अब ‘न्युट्रल’ स्थानमा हुने छ र सो स्थान खोज्न लाइपजिगको काम हुने छ र सो ठाउँमा हुने खेलको खर्च पनि लाइपजिग बेहोर्न पर्ने छ।

खेल लन्डनमा हुने पनि चर्चा रहेको छ तर केही पनि पुष्टि भएको छैन।