स्पेनिस ला लिगा अन्तर्गत शनिबार ओसासुनाविरुद्ध गोलरहित बराबरी खेलेपछि रियल म्याड्रिडका प्रशिक्षक जिनेदिन जिदानले मैदानको अवस्थालाई लिएर असन्तुष्टि व्यक्त गरेका छन् ।
खेलपछि निकै निराश मुद्रामा देखिएका जिदानले लगातार हिमपातका कारण खेल्न योग्य नै नरहेको मैदानमा खेल आयोजना गर्नु सहि निर्णय नरहेको अभिव्यक्ति दिए । ‘यो फुटबल खेल थिएन । खेल स्थगित हुनुपर्ने थियो । तर अब जे हुनु भइसक्यो,’ उनले भने, ‘खेल आयोजना गर्न वातावरण उपयुक्त थिएन । मैले बारम्बार दोहोर्याउन जरुरि छैन, तर मुख्य सार त्यहि नै हो । हामी अब कहिले फर्कन पाउँछौं पनि यकिन छैन ।’
रियल म्याड्रिडले पाम्प्लोनास्थित ओसासुनाको मैदानमा अपेक्षित प्रदर्शन गर्न सकेन । प्रतिकुल मौसमका कारण खेलाडीको प्रदर्शनमा असर परेको प्रष्ट थियो । त्यसअघि खेलका लागि आगमन हुने क्रममा पनि टोलीले ४ घण्टा विमानस्थलमा बस्नुपरेको थियो ।
रियलकै गोलरक्षक थिबाउट कोर्टुवाले भने लिगले खेलाडीलाई कठपुतली जस्तो व्यवहार गरेको बताए । ‘ओसासुनामा यहाँको मान्छेहरुले गरेको मिहिनेतको लागि धन्यवाद । हामीले जसोतसो खेल्न योग्य मैदान त पायौं । तर लिगले भने हामीलाई राम्रो व्यवहार गरेन । हामीलाई कठपुतली जस्तो व्यवहार भयो ,’ उनले भने, ‘हामी हिउँले भरिएको विमानस्थलबाट आउनुपर्यो । र अब फर्कने टुंगो छैन । यस्तो अवस्थामा पनि लिगले जबर्जस्ती खेलाउनु सहि होइन ।’
यता रियलकै मिडफिल्डर टोनी क्रुसले भने दुवै टोलीले एकै मैदानमा खेलेको कारण नतिजाको दोष मैदानलाई दिन नमिल्ने बताए । ‘हामीले स्तर अनुसार खेल्न सकेनौं । हामीले धेरै अवसर सिर्जना गर्नुपर्नेमा त्यसो गर्न सकेनौं,’ क्रुसले भने, ‘ हामीलाई थाहा थियो ओसासुनाले डिफेन्स गर्नेछ । र दुवै टोलीले एकै मैदानमा खेलेका हौं । यसलाई निहु बनाउन मिल्दैन ।’
