एसीसी इस्टर्न ट्‍वान्टी-२० छनोटका लागि नेपाली टोलीको घोषणा

नेपालले थाइल्यान्डमा हुने एसीसी इस्टर्न ट्‍वान्टी–२० छनोटका लागि १४ सदस्यीय अन्तिम टोली घोषणा गरेको छ । एसीसी इस्टर्न ट्‍वान्टी–२० छनोट फेब्रुअरी २९ बाट सुरु हुँदै छ ।

ज्ञानेन्द्र मल्लको कप्तानीमा रहेको नेपाली टोलीमा दीपेन्द्रसिंह ऐरी (उपकप्तान), पारस खड्का सन्दीप लामिछाने, विनोद भण्डारी, आरिफ शेख, करण केसी, अविनाश बोहरा, कुशल मल्ल, सुसन भारी, पवन सर्राफ, सन्दीप जोरा, किशोर महतो र भुवन कार्की छन् ।

बुधबार सम्पन्न क्रिकेट विश्वकप लिग २ खेलेको टोलीबाट सुवास खकुरेल, रोहितकुमार पौडेल, कमलसिंह ऐरी र ललितनारायण राजवंशीको स्थानमा पवन, सन्दीप जोरा, किशोर र भुवनलाई राखिएको छ । टोली प्रशिक्षकमा जगत टमाटा, भिडियो एनालिस्टमा रमन सिवाकोटी, फिजियोमा विक्रम न्यौपाने र व्यवस्थापकमा माधवकुमार कर्माचार्य छन् ।

उमेश पटुवालले राजीनामा दिएपछि टमाटालाई पुनः नेपालको प्रशिक्षकमा ल्याइएको हो ।

अगस्टमा मलेसियामा एसिया कपको छनोटका रूपमा रहेको प्रतियोगितामा नेपालले आफ्नो समूहमा चीन, थाइल्यान्ड र मलेसियासँग प्रतिस्पर्धा गर्ने कार्यक्रम थियो ।

तर कोरोना भाइरस संक्रमणका कारण चीनले प्रतियोगिताबाट आफ्नो नाम फिर्ता लिइसकेको छ ।

पूर्वघोषित तालिकाअनुसारको अर्को समूहमा हङकङ, म्यानमार, सिंगापुर र भुटान छन् । फाइनलमा पुग्ने दुई टोलीले एसिया कप छनोटमा चार राष्ट्रसँग प्रतिस्पर्धा गर्नेछन् ।

वेस्टर्न रिजनको फाइनलमा पुग्ने अर्को दुई टोलीले पनि एसिया कप छनोटमा खेल्नेछ ।

@Kantipur