इटालीको राष्ट्रिय टोलीबाट खेल्दै नेपाली युवा

आधुनिक फुटबलको भूराजनीतिलाई अब कुनै सीमाले रोक्दैन । त्यसैले त एक देशका नागरिक अर्को देशबाट निर्धक्क भएर खेल खेलिरहेका छन् । एउटै टिममा अटाएका छन् र उनीहरूको लक्ष्य, उद्देश्य समान बनिदिएका हुन्छन् ।

खेलकुद मात्र एउटा त्यस्तो विधा हो, जसमा जातीय, धार्मिक, साम्प्रदायिक र भाषिक गन्ध भेटिँदैन । राम्रो खेलाडीले विश्वको जुनसुकै देशमा पनि स्थान पाइरहेका छन् । यसको एउटै अर्थ हो खेलकुदको भाषा एउटै हुनु ।

विश्वका चर्चित खेलाडीले समेत युरोपमा फुटबल खेल्ने सपना बुनेका हुन्छन् । धेरैजसो अफ्रिकाबाट युरोप पस्ने खेलाडीमध्ये विरैले मात्र युरोपमा अवसर पाउँछन् । त्यसमा पनि कुनै पनि युरोपियन राष्ट्रको प्रतिनिधित्व गर्न पाउनु भनेको फुटबलमा आफूलाई सफल भएको मान्नुसरह हो ।

त्यसमा पनि दक्षिण एसियाबाट यस्तो अवसर सायदै खेलाडीले पाएका होलान् । तर, नेपाली मुलुकका विकास मेराग्लीयाले युरोपमा हलचल मच्चाएका छन् । विकास यस्ता खेलाडी हुन् जो हिमालयको राज्य काठमाडौंबाट युरोपको इटाली राष्ट्रिय टोलीबाट खेल्दै छन् । उनले इटालीको जर्सी लगाउँदै यू–१७ बाट युथ युरोकप खेलेका छन् ।

को हुन् विकास ?
सन् २००२ को नोभेम्बरमा विकास नेपालमा जन्मिएका थिए । विकाससँग हाल नेपाली र इटाली दुवै देशको पासपोर्ट छ । नेपालको ग्रामीण भेकमा जन्मिएको बताउने उनी आफ्नो पूरा नेपाली परिचय भने बताउन चाहँदैनन् ।

सामाजिक सञ्जाल फेसबुकमा पछ्याउँदा उनीसँग नेपालबाट एक जना व्यक्तिमात्र देखिन्छन् । जो पोखरामा एक रिसोर्ट व्यवसाय गरेर बसेका छन् । ती रिसोर्ट व्यवसायी पनि विकासबारे बोल्न चाहँदैनन् । तर, इटालीको सञ्चारमाध्यमका प्रकाशित समाचारअनुसार उनी शरणार्थीका रूपमा रहेको हुन सक्ने उल्लेख गरिएको छ ।

विकास सानैमा इटाली पुगेका थिए । उनलाई नेपाल भ्रमणमा रहेको एक इटालियन बेलाउनो फेमिलीले इटाली पु¥याएका थिए । सोही फेमिलीले विकासको इटाली नाम विकास मेराग्लिया राखिदिएका थिए । हाल सोही नामबाट उनी इटालीमा परिचित छन् ।

फुटबल यात्रा
विकासले आफ्नो फुटबल यात्रा इटालीको फिल्ट्रेस युथ टिमबाट सुरु गरेका थिए । अझै १७ वर्ष नपुगेका विकासले उक्त टिममा आफूलाई प्रमाणित गर्न सफल भए । प्रायः सेन्टर स्ट्राइकरको पोजिसनबाट खेल्ने उनी आवश्यकताअनुसार अट्याकिङ मिडफिल्डमा पनि खेल्न सक्ने क्षमता राख्छन् । सन् २०१३–१४ को सिजन जियोभानी बोसिको यू–१७ टिम दोस्रो भयो । जहाँ विकास सम्मिलित टिम भेनिससँग दुबै गेम ४–१ र २–० ले पराजित भएको थियो । सन् २०१५ मा १३ वर्ष पुगेका विकासले भेनेटो छोड्दै बेर्गामो पुगे ।

इन्टर र युभेन्टससँग प्रतिस्पर्धा
त्यसपछि नेपाली प्लेमेकर विकास एटलान्टाइन नर्सरीमा सन् २०१५–१६ को सिजनमा आएका थिए । सिजनमा जहाँ उनले यू–१७ च्याम्पियनसिप सेमिफाइनल इन्टरसँग खेलेर सकेका थिए ।

विकासका लागि सबैभन्दा महत्त्वपूर्ण सिजन रह्यो यू–१४ च्याम्पियनसिप । एटालान्टाबाट उनले २८ खेल खेल्दै १३ गोल गरेका थिए । यस्तै अन्डर १५ च्याम्पियनसिपमा उनले २२ खेल खेल्दै ७ गोल गरेका थिए । क्वाटरफाइनलमा एटलान्टा साम्डोरियासँग पराजित भएको थियो ।

सन् २०१६–१७ मा एटलान्टा सेमिफाइनलसम्म पुग्दा विकासले २६ खेल खेल्दै ५ गोल गरेका थिए । सेमिफाइनलमा टिम युभेन्टस्सँग अतिरिक्त समयमा हार्न पुग्यो तर विकास फिल्डमा उत्कृष्ट मध्येका एक थिए । उनले २०१८–१९ को सिजनमा १७ खेल खेल्दा ३ गोल र एक असिस्ट गरेका थिए ।

हाल उनी भेनिजिया यू–१९ टिमबाट खेल्दै छन् । उनले २०१९–२० को सिजनमा भेनिजियाबाट १६ खेल खेलेका छन् । जारी सिजनका १६ खेलमा ३ गोल गरेका छन् ।

इटालीको यू–१७ राष्ट्रिय टिम
सन् २०१८ मा विकासले पहिलोपटक इटालीको यू–१७ राष्ट्रिय टिमबाट खेल्ने अवसर पाए । प्रशिक्षक डानियल जोराट्टोले फेब्रुअरीमा पोर्चुगलमा आयोजना भएको भिया रियल डे सान्टो एन्टोनिया अन्तर्राष्ट्रिय प्रतियोगितामा विकासलाई टिममा समावेश गराएका थिए । उक्त प्रतियोगितामा इटाली, आयोजक पोर्चुगलसँगै जर्मन र होल्यान्डको पनि सहभागिता थियो । उनले उक्त प्रतियोगिताका दुई खेल खेलेका थिए ।

@baahrakhari.com