इंग्ल्यान्डसँग पराजित भएपछि क्रोएसिया रेलिगेसनमा

एक गोलले पछाडी रहेको स्थितिमा इंग्ल्यान्डले खेलको अन्त्यतिर ७ मिनेटको अन्तरमा दुई गोल फर्काउँदै नेसन्स लिगको सेमिफाइनलमा स्थान बनाएको हो । निकै प्रतिस्पर्धात्मक खेलको पहिलो हाफ गोलरहित बराबरीमा टुंगिएको थियो । दोस्रो हाफमा क्रोएसियाले सुरुवाती अग्रता बनायो । ५७ औं मिनेटमा आन्द्रे क्रामारीचले गरेको प्रहार एरिक डाएरलाई लाग्दै गोलमा परिणत भएको थियो ।

इंग्ल्यान्डले त्यसपछि तीन आक्रामक परिवर्तन गर्दै खेलको स्थिति नै बदल्यो । ७८ औं मिनेटमा कप्तान केनले पेनाल्टी क्षेत्रभित्र भिडभाडमा प्रहार गरेको सटलाई जेसे लिंगार्डले गोललाइन अगाडीबाट पोस्टतर्फ पठाउँदै खेल बराबरीमा ल्याए । त्यसको ७ मिनेटपछि केन आफैंले गोल गर्दै खेलमा इंग्ल्यान्डलाई अगाडी बढाए । उनले बेन चिल्वेलको फ्रिकिकमा गोल गर्दै इंग्ल्यान्डको रेलिगेसन टारेका थिए ।

खेलमा क्रोएसियाको जित भएको अवस्थामा क्रोएसिया अर्को चरणमा पुग्ने पक्का थियो । बराबरी भएको अवस्थामा स्पेन प्लेअफमा पुग्ने समिकरण रहेको थियो । इंग्ल्यान्डले पराजय वा बराबरी खेलेको अवस्थामा रेलिगेसनमा पर्ने थियो । इंग्ल्यान्डको जितसँगै क्रोएसिया भने ‘बी’ श्रेणीमा झरेको छ ।
अब इंग्ल्यान्डले अर्को जुनमा पोर्चुगलमा हुने नेसन्स लिगको अन्तिम चरणमा खेल्नेछ । नेसन्स लिगको समूह चरणमा इंग्ल्यान्डले ४ खेलमा ७ अंक जोड्दा स्पेनले ६ र क्रोएसियाले ४ अंकमात्र जोड्न सक्यो ।