आर्सनलको फराकिलो जित, उत्कृष्ट प्रदर्शन जारी

आर्सनलले इंग्लिस प्रिमियर लिगमा सानदार जित निकालेको छ ।

आर्सनलले घरेलु टोली लिड्समाथि ४–१ को फराकिलो जित आत्मसात गरेको हो । आर्सनलका लागि बुकायो साका र इमिल स्मिथ रोवीले गोल थप्दा लिड्सका राफिन्हाले एक गोल फर्काए । एलान रोड वेस्ट योर्कसायरमा शनिबार राति भएको खेलको १६औं मिनेटमा मार्टिनेलीको गोलबाट आर्सनलले सुरुवाती अग्रता लिएको थियो ।

उनले एलेसान्द्रे लाकाजेटको पासमा गोल गरेका थिए । २८औं मिनेटमा मार्टिनेलीको ग्रानिट झाँकाको पासमा गोल गर्दै आर्सनलको अग्रता दोब्बर पारे । ४२औं मिनेटमा बुकायो साकाले गोल गर्दै आर्सनललाई पहिलो हाफमा ३–० ले अघि बढाए ।

७५औं मिनेटमा राफिन्हाले पेनाल्टीमार्फत गोल गर्दै खेललाई ३–१ को अवस्थामा ल्याए । जोइ गेलहाड्टले पेनाल्टी बक्समा माटेअस क्लिचलाई फउल गरेपछि लिड्सले पेनाल्टी पाएको थियो । ८४औं मिनेटमा इमिल स्मिथ रोवीले गोल गर्दै आर्सनलको जित पक्का गरे । उनले मार्टिन ओडेगार्डको पासमा गोल गरेका थिए ।

यो जितसँगै आर्सनलले शीर्ष चारमा बलियो पकड बनाएको छ । आर्सनलको १८ खेलबाट ३२ अंक छ । एक खेल कम खेलेको वेस्टह्यामको २८ अंक छ । पराजित लिड्स १६ अंक जोडेर १६औं स्थानमा छ ।