आफ्नो स्टार गोलकिपर बेच्न म्यान्चेस्टर युनाइटेड तयार हुने – पिएसजी साइन गर्न इच्छुक

म्यान्चेस्टर युनाइटेड आफ्नो गोलकिपर डेभिड दे हेयालाई बेच्न तयार हुने खबर छ। खबर अनुसार ३० वर्षका स्पेनिस गोलकिपरको लागि अन्य क्लबबाट प्रस्ताव सुन्न युनाइटेड तयार हुने छ।

हाल डेभिड दे हेयाको फम धेरै राम्रो हुन सकेको छैन भने युनाइटेडमा उनको प्रति हप्ताको तलब £३५०,००० रहेको छ र उनलाई बेचेर आफ्नो तलब खर्च कम गर्न युनाइटेड इच्छुक रहेको खुलेको छ। युनाइटेडमा डीन हेंडरसनको राम्रो प्रदर्शन रहेको बेला उनले डेभिड दे हेयाको ठाउँ लिन सक्ने युनाइटेडको विश्वास छ।

डेभिड दे हेयामा भने फ्रेन्च क्लब पिएसजीको नजर छ। हाल नयाँ गोलकिपरको खोजीमा रहेको पिएसजीले म्यान्चेस्टर युनाइटेडका गोलकिपर डेभिड दे हेयालाई आफ्नो सुचीमा राखेको खबर छ।

द सनका अनुसार पिएसजीका कोच मौरिसियो पोचेटिनोले युनाइटेडका गोलकिपर डेभिड दे हेयालाई आफ्नो मुख्य लक्ष्यको रूपमा पहिचान गरेका छन्। पिएसजीको नयाँ गोलकिपरको खोजी तीव्र रहेको छ भने पिएसजीले एसी मिलानका स्टार गोलकिपर जियानलुजी डोनारुम्मा र स्पर्सका गोलकिपर ह्युगो लोरीसमा पनि चासो देखाएको छ।