सावित्रा भण्डारी सम्मिलित गोकुलम केरला एफसीले इण्डियन वुमन्स लिग (आईलिग) मा फराकिलो जित निकालेको छ ।
मंगलबार आफ्नो दोस्रो खेल खेलेको गोकुलमले केन्क्रे एफसीलाई १०–१ को फराकिलो हरायो । ब्याङग्लोर फुटबल स्टेडियममा भएको उक्त खेलमा गोकुलमको जितमा सावित्राले पाँच गोल गरिन् ।
उनले सावित्राले ह्याट्रिकसहित ५ गोल गरेकी हुन् । उनले खेलको सातौँ मिनेटमा पहिलो गोल गरिन् भने १९औं मिनेटमा दोस्रो गोल थपिन् । यस्तै पहिलो हाफको इन्जुरी समयमा गोल गर्दै ह्याट्रिक पूरा गरिन् ।
सावित्राले ४८औँ मिनेटमा चौथो तथा ६१औं मिनेटमा पाँचौ गोल गरेकी थिइन् । उनी म्यान अफ द म्याचसमेत घोषित् भइन् ।
यसअघि उनको टोली गोकुलमले पहिलो जित निकाल्दा सावित्राले निर्णायक गोल गरेकी थिइन् । आइतबार आफ्नो पहिलो खेल खेलेको गोकुलमले श्रीभुमी एफसीलाई १–० गोलले हराउँदा सावित्राले निर्णायक गोल गरिन् ।
त्यसअघि छनोट चरणको अन्तिम खेलमा गत बुधबार सावित्राले २ गोल गरेकी थिइन् । गत संस्करण सेथु एफसीबाट खेलेकी सावित्राले यो सिजन गोकुलम एफसीबाट खेलेकी हुन् । उनले ७ नम्बरको जर्सी पाएकी छन् ।
