बायर्न म्युनिखले जर्मन बुन्डेसलिगामा सानदार जित निकालेको छ । बायर्नले वल्फ्सवर्गलाई ४–० को फराकिलो गोल अन्तरले पराजित गरेको हो ।
घरेलु मैदानमा बायर्नको सानदार जितमा लेवान्डोस्कीसँगै थोमस मुलर, डेअट उपमेकानो र लिरोए सानेले गोल गरे । एलिएन्ज एरिना म्युनिखमा शुक्रबार राति भएको खेलको सातौ मिनेटमा थोमस मुलरको गोलबाट बायर्नले अग्रता लिएको थियो । ५७औं मिनेटमा डेअट उपमेकानोले मुलरको पासमा गोल गर्दै बायर्नको अग्रता दोब्बर पारे ।
५९औं मिनेटमा लिरोए सानले सर्ज जिनाब्रीको पासमा गोल गर्दै बायर्नलाई सहज जिततर्फ अघि बढाए । ८७औं मिनेटमा लेवान्डोस्कीले जमल मुसिएलाको पासमा गोल गर्दै बायर्नको जित पक्का गरे ।
वल्फ्सवर्गविरुद्ध एक गोल गरेसँगै लेवान्डोस्कीले गर्ड मुलरको कीर्तिमान तोडेका छन् । मुलरले सन् १९७२ मा ४२ गोलको कीर्तिमान राखेका थिए । लेवान्डोस्कीले सन् २०२१ म ४३ गोल गर्दै गर्ड मुलरको कीर्तिमान तोडेका हुन् ।
यो जितसँगै बायर्नले शीर्षस्थानमा ९ अंकको अग्रता बनाएको छ । बायर्नको १७ खेलबाट ४३ अंक पुगेको छ । एक खेल कम खेलेको डर्टमुन्डको ३४ अंक छ । पराजित वल्फ्सवर्ग २० अंक जोडेर १२औं स्थानमा रहेको छ ।
