एजेन्सी । इङ्लिस प्रिमियर लिग अन्तर्गतको खेलमा लिभरपुल र एष्टन भिल्ला बिचको खेलमा लिभरपुल विजय भएको छ । लिभरपुलले १-० गोलले भिल्लालाई हराएको हो ।
लिभरपुलका लेजेन्ड स्टिभन जेराडको टिम अष्टन भिल्लाले पहिलो हाफमा रोक्न सफल भए पनि दोश्रो हाफमा गोल व्योहोर्न पुग्यो ।
२०१५ मा लिभरपुलबाट संन्यास लिएका जेराड क्लब छोडेयता पहिलो पटक लिभरपुलमा विपक्षी टिमको प्रशिक्षकको भुमिकामा फर्केका थिए ।
खेल पहिलो हाफमा बल लिभरपुलले नियन्त्रणमा राख्न सफल रहे पनि गोलका लागि दोश्रो हाफ पर्खिनु पर्यो ।
घरेलु टोलिले दोश्रो हाफको ६४ औं मिनेट पेनाल्टीको अवसर प्राप्त गरे । विपक्षी डिफेन्डरले सालाहलाई डि बक्समा लडाए पछि पेनाल्टी प्राप्त गरेको हो ।
उक्त पेनाल्टीलाई सालाहले गोलमा परिणत गर्न सफल रह्यो ।
त्यसपछि, दुबै टोलिले पाएको मौकाहरु सदुपयोग गर्न नसक्दा खेल लिभरपुलले जित्न सफल रह्यो ।
यो जितसंगै लिभरपुल तालिकामा दोश्रो स्थानमा यथावत रहेको छ । उसले १६ खेलमा ३७ अंक जोडेर दोश्रो स्थानमा रहेको छ ।
एष्टन भिल्ला १६ खेलमा १९ अंक जोड्दै ११ औं स्थानमा छ ।
