म्यानचेस्टर युनाइटेडले स्पेनिस क्लब भिल्लारियलमाथि सहज जित निकाल्दै युइएफए च्याम्पियन्स लिगको नकआउट चरणमा स्थान पक्का गरेको छ ।
घरेलु टोली भिल्लारियललाई २–० ले पराजित गरेपछि युनाइटेडले समूह चरणको एक खेल बाँकी छँदै अन्तिम १६ मा स्थान पक्का गरेको हो । युनाइटेडको जितमा क्रिस्टियानो रोनाल्डो र जाडोन सान्चोले गोल गरे । दुवै गोल दोस्रो हाफमा भएको थियो ।
भिल्लारियलमा मंगलबार राति भएको प्रतिस्पर्धात्मक खेलको पहिलो हाफ गोलरहित बराबरीमा सकिएको थियो । ७८औं मिनेटमा रोनाल्डोले गोल गर्दै युनाइटेडलाई १–० को अग्रता दिलाए । रोनाल्डोेले भिल्लारियलविरुद्ध एक गोल गरेसँगै उनले व्यवसायिक खेल करिअरमा ८ सय गोलको नयाँ कीर्तिमान बनाएका हुन् ।
इन्ज्युरी समयको थप गरिएको पहिलो मिनेटमा जाडोन सान्चोले गोल गर्दै युनाइटेडको जित पक्का गरे । उनले वैकल्पिक मिडफिल्डर ब्रुनो फर्नान्डेसको पासमा गोल गरे । जितपछि युनाइटेडको ५ खेलबाट १० अंक भएको छ । पराजित भिल्लारियल ७ अंक जोडेर दोस्रो स्थानमा रहेको छ । एटलान्टाको ६ तथा योङ ब्वाइजको ४ अंक छ ।
यो जितसँगै अन्तरिम प्रशिक्षक माइकल क्यारिकले आफ्नो पहिलो प्रशिक्षणमा युनाइटेडलाई जित दिलाउन सफल भएको छ । मुख्य प्रशिक्षक ओले गनर सोल्सायरलाई बर्खास्त गरेपछि क्यारिकले अन्तरिम प्रशिक्षकको जिम्मेवारी पाएको थियो ।
पराजित भिल्लारियललाई नकआउट चरणमा स्थान बनाउन अन्तिम चरणको खेलको नतिजा नै कुर्नुपर्ने हुन्छ । समूह चरणको अन्तिम खेलमा भिल्लारियल र एटलान्टा तथा म्यानचेस्टर युनाइटेड र योङ ब्वाइजबीच प्रतिस्पर्धा हुदैछ ।
यही समूह ‘एफ’ को अर्काे खेलमा योङ ब्वाइज र एटलान्टाले ३–३ गोलको बराबरी खेल्दै अंक बाँडेका छन् । घरेलु टोली योङ ब्वाइजका थियोसन जोर्डन सिवाटचिउ, भिनसेन्ट सिरो रसिल्भान हेफ्टीले गोल गर्दा एटलान्टाका डुभान जापटा, जोस लुइस पालोमिनो र लुइस मुरेलले गोल गरे ।
