बोरुसिया डर्ट्मुन्डलाई हराउदै पोर्चुगिज क्लब स्पोर्टिङ सिपी च्याम्पियन्स लिगको अन्तिम १६ मा प्रवेश गरेको छ । बुधबार राति भएको समूह चरणको खेलमा जर्मन क्लब बोरुसिया डर्टमुन्डमाथि ३–१ गोलको जित दर्ता गर्दै सिपी अघिल्लो चरणमा प्रवेश गरेको हो ।
घरेलु मैदानमा सिपीलाई जिताउन पेड्रो गोन्काल्भेसले दुई गोल गर्दा पेड्रो पोरोले एक गोल गरे । डर्टमुन्डका डेनियल मलेनले सान्त्वना गोल फर्काए ।
खेलको ३०औँ र ३९औँ मिनेटमा गोन्काल्भेसले गोल गर्दै सिपीलाई पहिलो हाभभरि २–० गोलको अग्रता दिलाएका थिए । ७४औँ मिनेटमा इम्रे क्यानले रातो कार्ड पाएपछि भ्रमणकारी टोली डर्टमुन्ड १० खेलाडीमा सीमित बनेको थियो ।
खेलको ८१औँ मिनेटमा पोरोले गोल गर्दै सिपीको अग्रता तेब्बर बनाए । खेलको इन्ज्युरी समयमा डर्टमुन्डका मलेनले गोल गरेपनि टोली खेलमा फर्किन पर्याप्त रहेन ।
जितसँगै समूह ‘सी’को सिपीले पाँच खेलमा नौ अङ्क जोड्दै दोस्रो स्थानमा रहदै अघिल्लो चरणमा स्थान पक्का गरेको हो । डर्टमुन्ड भने ६ अङ्कका साथ तेस्रो स्थानमा रह्यो र अर्को चरणमा जाने मौका गुमाउँदै युरोपा लिगमा झरेको छ ।
