बायर्न म्युनिकले पोर्चुगिज क्लब बेन्फिकामाथि ५–२ को फराकिलो जित निकालेको हो ।
एलिएन्ज एरिनामा म्युनिखमा मंगलबार राति भएको खेलमा घरेलु टोलीले खेलको २६औं मिनेटमा रोबर्ट लेवान्डोस्कीको गोलबाट अग्रता लिएको थियो । उनले किङ्सले कोमनको पासमा गोल गरेका थिए । ३२औं मिनेटमा सर्ज जिनाब्रीले लेवान्डोस्कीको पासमा गोल गर्दै बायर्नको अग्रता दोब्बर पारे ।
३८औं मिनेटमा मोराटोले गोल गर्दै खेललाई २–१ को अवस्थामा ल्याए । पहिलो हाफको इन्ज्युरी समयको थप गरिएको पहिलो मिनेटमा लेवान्डोस्की पेनाल्टीमा चुके । ४९औं मिनेटमा लिरोए सानेले अलफन्सो डाभिसको पासमा गोल गर्दै बायर्नलाई ३–१ ले अघि बढाए ।
६१औं मिनेटमा लिरोए सानेको पासमा गोल गर्दै लेवान्डोस्कीले व्यक्तिगत दोस्रो तथा टोलीका लागि चौथो गोल गरेपछि बायर्न फराकिलो जिततर्फ अग्रसर बन्यो । ७४औं मिनेटमा डार्विन नुनेजले गोल गर्दै खेललाई ४–२ को अवस्थामा ल्याएपनि ८४औं मिनेटमा लेवान्डोस्कीले ह्याट्रिक पुरा गर्दै बायर्नलाई ५–२ को फराकिलो जित दिलाए ।
यो जितसँगै बायर्नले समूह चरणमा दुई खेल बाँकी छदै च्याम्पियन्स लिगको नकआउट चरणमा स्थान सुरक्षित गरेको छ । यो जितपछि समूह ‘ई’ मा अपराजित रहेको बायर्न ४ खेलबाट १२ अंक जोडेर शीर्षस्थानमा रहेको छ । पराजित बेन्फिका ४ अंक जोडेर तेस्रो स्थानमा रहेको छ ।
यही समूहको अर्काे खेलमा क्याटलान क्लब बार्सिलोनाले युक्रेनी क्लब डेनामो किएभलाई १–० ले पराजित गर्दै नकआउट चरणमा पुग्ने सम्भावना जीवितै राखेको छ । बार्सिलोनाको जितमा अन्सु फातीले ७०औं मिनेटमा गरेको गोल नै निर्णायक बन्यो ।
जितपछि बार्सिलोना ४ खेलबाट ६ अंक जोडेर दोस्रो स्थानमा उक्लिएको छ । पराजित किएभ १ अंकसहित पुछारमा छ ।
