पेरिस सेन्ट जर्मेन हारबाट जोगिएको छ ।
पिएसजीले घरेलु टोली लेन्ससँग १–१ गोलको बराबरी खेल्दै अंक खोस्न सफल भएको हो । डेलिलिस फ्रान्समा शनिबार राति भएको खेलमा घरेलु टोली लेन्सले ६२औं मिनेटमा सेको फोफानाको गोलबाट अग्रता लिएको थियो । उनले चिक ओउमार डोउकौरेको पासमा गोल गरेका थिए ।
हारतर्फ उन्मुख पिएसजीलाई वाइनाल्डमलले इन्ज्युरी समयको थप गरिएको दोस्रो मिनेटमा गोल गर्दै हारबाट जोगाए । उनले केलियन एमबाप्पेको पासमा गोल गरेका थिए । पिएसजीको यो लगातार दोस्रो बराबरीको नतिजा हो । यसअघि पिएसजीले निससँग गोलरहित बराबरी खेलेको थियो ।
यो बराबरीसँगै पिएसजी १७ खेलबाट ४२ अंक जोडेर शीर्षस्थानमा यथावत रहेको छ । पिएसजीले दोस्रो स्थानको मार्सेलाई १३ अंकले पछि पारेको छ । लेन्स २७ अंक जोडेर पाँचौ स्थानमा रहेको छ ।
