एजेन्सी, आइसिसी ट्वान्टी २० विश्वकपमा अस्ट्रेलियाले विजयी सुरुआत गरेको छ । अस्ट्रेलियाले आज भएको सुपर १२ को पहिलो खेलमा दक्षिण अफ्रिकालाई पाँच विकेटले पराजित गरेको हो ।
दक्षिण अफ्रिकाले दिएको एक सय १९ रनको लक्ष्य अस्ट्रेलियाले १९.४ ओभरमा पाँच विकेटको क्षतीमा पूरा गर्यो ।
अस्ट्रेलियाको जितमा स्टिभ स्मिथले सर्वाधिक ३५ रन बनाए । यसैगरी मार्कुस स्टोइनिसले २४ रन जोड्दा ग्लेन म्याक्सवेलले १८ र म्याथु वेडले १५ रनको योगदान गरे ।
दक्षिण अफ्रिकाका एनरिक नर्टजीले दुई विकेट लिँदा कागिसो रवाडा, केसव महाराज र तवरेज साम्सीले समान एक विकेट लिए ।
यसअघि अबुधाबीस्थित शेख जायेद क्रिकेट रंगशालामा टस हारेर ब्याटिङका लागि निम्त्याइएको दक्षिण अफ्रिकाले निर्धारित २० ओभरमा नौं विकेट गुमाउँदै एक सय १८ रनको योगफल तयार गरेको थियो ।
दक्षिण अफ्रिकाका आइदेन मार्करामले ४० रन जोडे । त्यस्तै कगिसो रवाडाले १९ र डेभिड मिलरले १६ रनबाहेक अन्य ब्याटरको गतिलो योगदान रहेन ।
अस्ट्रेलियाका मिचेल स्टार्क, जोस हेजलउड र एडम जाम्पाले समान दुई विकेट हात पारे । त्यस्तै ग्लेन म्याक्सवेल र पाट कमिन्सले १-१ विकेट लिए ।
